2Pe 3 | MED | STEP | Na nga wamp mᵾn kupa kᵾⱡ nga, akil tep mon ei rop enim ngunt, ya mon raⱡ ila, enim ik ei mel kundᵾp nᵾnt, enim nga numan orunga, nᵾmp piral ndont, wote ik ei, pilik mbi nduing.

2 Peter 3

Nuim Ei Kupa Yant Omba

1 Na nga wamp mᵾn kupa kᵾⱡ nga, akil tep mon ei rop enim ngunt, ya mon raⱡ ila, enim ik ei mel kundᵾp nᵾnt, enim nga numan orunga, nᵾmp piral ndont, wote ik ei, pilik mbi nduing. 2 Wote, na pᵾnt ei, enim ndi, ik akil tepa omba ei piling, painui wu wingti mbᵾ ndi, nᵾk mot ndurum. Ei ndi, Nuim ei nga mi ik ei kᵾn, tᵾn Etpa Rukrᵾng Ti Wu ei kᵾn, enim nga nombuⱡa rung wu kᵾⱡ nga ik pᵾtᵾng ei, kapⱡa pilik muⱡᵾi!

3 Unt enim uⱡ ei, pilik kungᵾndi ui pora nimba ei kᵾn, enim tᵾk ik kulding wamp mbᵾ ekit ok, en enim nga uⱡ kit etmin numan orunga petᵾm mbᵾ, pep ru-ing. 4 Ei mel, nimba mᵾi ropa, nᵾk mel, “Elim yant uimp nitim ei? Wote elim nᵾl morum? Elim ui nawᵾm. Unt anda kouwᵾmᵾn korung ui ei kᵾn omba, akup ei kᵾn, mel mbᵾ kump kᵾm itim ei mel ku, akup tetᵾm. Ei Got ndi, mim itim ei mel,” nᵾtᵾng. 5 Unt kor nga, Got ndi, ik nilinga, muⱡ mᵾi raⱡ pitim. Wote nu ila, mᵾi ei etpa oⱡa titim. Uⱡ ei, wamp mbᵾ pilik kun iti natᵾtmᵾn. 6 Wote, Got ndi nilinga, nu ei, mᵾi kona ila kui omba, mel mbᵾ ropa kundrum. 7 Wote, Got nga ik ei ndi, akup muⱡ ei tᵾpa, kum roⱡnga, mᵾi ei ndi, ndip elim kᵾn omba ei nga, nokundpa morum. Wamp kit mbᵾ, Got tᵾk mbuⱡ ngormᵾn wamp mbᵾ, kᵾmp tᵾpa, ropa kaⱡmba ei nga, nokundᵾk mormin.

8 Wote, na nga wamp min mul kᵾⱡ, enim kᵾn ik ti nimp ent ei, tᵾk apra ndui nᵾndᵾi. Wu Nuim ei nga pilpa kungᵾndi ila, rumbᵾⱡ tenda ei, pana 1000 mel, wote pana 1000 ei, rumbᵾⱡ tenda mel kapⱡa. 9 Wote, Nuim ei ndi, nimba mᵾi rurum ei nga mel mbᵾ, wang ndupa kongun iti natᵾtᵾm. Wote, wamp mat ndi, kongun wang nduk iting ei nga puⱡ ei pᵾtmᵾn, mon. Wote, elim ndi pᵾtᵾm ei, wamp tenda ti, pok tiki puⱡi napᵾⱡeing nimba pᵾtᵾm. Elim ndi pᵾtᵾm ei, wamp pᵾi numan ropᵾl ring nimba pᵾtᵾm. Wote elim ndi, tᵾn nga nᵾndpa, nokundpa mint morum.

Wote Muⱡ Mᵾi Raⱡ Pora Ninggil

10 Wote Nuim ei, yant omba ui ei, kindᵾp wamp na ni mel omba. Ui ei kᵾn, muⱡ ei, kump kiraipa mam ti, etpa muⱡ ei pora nimba. Wote, muⱡ ila mel kel kel petᵾm mbᵾ, ndip ei ndi, nomba pora ndumba. Mᵾi ei kunda ku, mel mim itim mbᵾ, kump kᵾm ndip ei ndi, nomba pora ndumba.

11 Wote, mel mbᵾ pᵾi, i etpa pora nimba. Ei nga wote, enim etᵾk muⱡing, mel nant? Enim nombuⱡa mam wingti ila andᵾk, Got nga uⱡ kai mbᵾ pep rᵾi! 12 Uⱡ ila, Got nga ui ei, nokundpᵾn muⱡᵾmin. Enim ndi, ui ei kongun ronduⱡ mundᵾk rᵾk rᵾk etangina, ui ei ekit wangga! Wote, ui ila mint, muⱡ ei, ndip nomba pora nimba. Wote, ama ndip ei ndi, mel kel kel mbᵾ kump kᵾm nangga, nu mel etmba. 13 Wote Got ndi, nimba mᵾi ropa kᵾn, muⱡ kont ti kᵾn, mᵾi kont ti kᵾn, mim itimp nitim. Wote, ila uⱡ kun kai mbᵾ mint temba. Tᵾn mᵾi mang kona ei, nokundpᵾn mormun.

Tᵾn Ndi, Rᵾp Etpᵾn Nokundpᵾn Muⱡamin

14 Wote, na nga wamp mᵾn mul kᵾⱡ, enim ndi, ui ei, nokundᵾk mormin. Wote ei mel, kongun ronduⱡ mundᵾk, etᵾk kun kai muⱡᵾi! Uⱡ kit mbᵾ iti nᵾtᵾi! Wote Got ndi, enim moⱡpa kundi uⱡ kai ei ngangga, molk kai munding. 15 Tᵾn nga Nuim ei ndi, enim nga nokundpa wang ndupa etᵾm. Wote enim ndi, pili uⱡ i itim ei ndi, enim etpa rukrᵾng tᵾmba. Wote, Got pilpa kungᵾndi kai ei, tᵾn nga ᵾngᵾn kupa, Pol ngurum. Wote, Pol ndi kunda, ik ei enim mon ropa ngurum. 16 Ei mel, elim nga mon kump kᵾm rᵾrᵾm mbila, ik ronduⱡ pei mat rurum. Ik mbᵾ, wamp ni, wamp mbᵾ ndi, pilik kun iti natᵾtmin. Wamp mat, pilik kungᵾndi neng tᵾtmᵾn, ik ei, ropᵾl rop ti mel nᵾtmᵾn. Ei kᵾn, Buk Wingti ila ik mat petᵾm mbᵾ, uⱡ ei mel ku etmᵾn. I etᵾk kᵾn, en enim etᵾk kit mondᵾrmᵾn.

17 Wote, na nga wamp mᵾn mundi kᵾⱡ, enim ndi, pilik pora ndunmin uⱡ mbᵾ, wote ekit omba ei nga, rᵾp etᵾk kai mundᵾi! Wote, mi ik ila, tᵾpa roi ndui wamp mbᵾ ndi, enim tᵾk tiki pindangina, enim ronduⱡ mundᵾk muⱡi nᵾmbᵾⱡing. 18 Wote, tᵾn nga Nuim ei nga wamp poⱡ ti uⱡ ila mormin ei kᵾn, tᵾn Rukrᵾng Titim Wu ei, Jisas Kraist tᵾn ndi, elim pᵾtmᵾn. Ei kᵾn, enim ndi, numan wang nduk, ei ama ou nduk tᵾtmᵾn. Wote enim ndi, pilpa kungᵾndi ou ndupa, Kraist kᵾn tᵾtmᵾn. Elim mbi ou tᵾpa, wote ui mbila rᵾk rᵾk moⱡpa, mint mba. Ei kupa!